« | »

Nampahantrain'ny facebook ny internet

2012-03-19 @ 08:32 in Izaho sy ny ahy

Nampahandrain'ny FB ny internet

Taona maromaro lasa izay, rehefa nanazava tamin'olona vitsivitsy ny atao hoe internet aho, fony mbola vitsy dia vitsy ny Malagasy nampiasa azy, dia nohariko tamin'ny tranomboky (bibliothèque) lehibe izy. Rehefa miditra ao anaty Internet ianao dia miditra ao anaty tranomboky iray lehibe. Rehefa miditra amin'io tranomboky io ianao dia sady mpanjifa no mpanome. Izany hoe sady afaka mitady sy mamaky ny boky ao ianao no afaka mampiditra boky vaovao ihany koa. Izay indrindra no tena haren'ny internet. Mitombo hatrany ny loharano satria izay miditra dia tsy vitan'ny hoe mitady sy mamaky fotsiny fa mampiditra izay fantany ihany koa. Mazava ho azy, vokatr'izay dia maro karazana ny boky ao, misy ny mahaliana sy tsy mahaliana, ny marim-pototra sy tsy marim-pototra. Tsy maninona izany fa anjaran'ny mpamaky indray avy eo no manivana izay mety aminy. 

Izaho dia anisan'ny mpanjifa mahafatra-po amin'ny internet. Rehefa misy zavatra mahaliana ahy dia tadiaviko avy hatrany ao amin'ny Google aloha satria inoako fa efa nisy resaka momba izany taloha, na efa nisy nampiditra tao amin'ilay tranomboky ilay izy. Tarigetrako ny hoe "Google est mon ami" rehefa misy zavatra tadiaviko. Resaka fahasalamana, resaka sakafo, resaka honohono tiako hamarinina, hatramin'ny anaran'olona fotsiny aza. Omaly aho izao nitady hoe tsara ve ny mihinana atody manta aty andafy sa misy lafy ratsiny. Tonga dia notadiaviko tao amin'ny google fotsiny hoe "mihinana atody manta" (Jereo eto ny vokany) sy ny hoe "manger oeuf cru" dia nahita valiny maro aho (jereo eto). Dia nanampy ahy io hoe mila mitandrina satria misy an'izany salmonelle izany. Ireo fahalalana hitako ireo dia nisy nampiditra tao amin'ny internet, tamin'ny forum, na tamin'ny alalan'ny blaogy, vao hitako tao. Rehefa tsy misy mampiditra zavatra toa izany intsony dia tsy hahita zavatra hotadiavina intsony aho.

Eto indrindra no idiran'ny hoe mampahantra internet ny facebook. Amin'izao fotoana izao dia vitsy ny mampiasa blaogy, forum, sns. Satria ao amin'ny facebook daholo no ampidirana zavatra mahaliana. Ivereno jerena nefa ilay rohy roa mikasika ny atody manta tetsy ambony fa tsisy valiny azonao avy ao amin'ny facebook mihitsy ny pejy voalohandohany ao. Miha-mahantra noho izany ilay tranomboky goavan'ny internet satria na tsy misy mampiditra zavatra mahaliana intsony ao anatiny, na any amin'ny toerana mihidy sisa no ampidirana zavatra mahaliana. Ka any aoriana any, rehefa mitady zavatra ianao dia tsy hisy vokany vaovao intsony fa izay nisy nampiditra tamin'ny taona 2007 ihany sisa no ho hitanao.

Misy izao, ao amin'ny facebook ao, vondrona iray mikasika ny teny malagasy, izay inoako fa mahaliana olona maro. Azo atao ety ivelany tsara, saingy ao anaty Facebook ilay izy, dia raha liana ianao dia tsy maintsy ao anaty facebook. Raha misy fitadiavana amin'ny google any aoriana any hoe misy "n" ve ny mihitsy sa tsy misy, dia tsy hitranga mihitsy ny lahatsoratra ao anatin'io vondrona io na dia efa noresahina tao aza izany... satria tsy natao ho an'ny rehetra ny fifampizaràna ao.

Ny vahaolana hitako sy ezahiko ampitaina hatrany dia hoe manorata ihany koa ivelan'ny facebook, indrindra raha zavatra heverinao ilain'ny olona hafa. Aza soratana eo amin'ny rindrinao fotsiny ny zavatra mety hahaliana ny hafa, satria voalohany indrindra mety ny namanao ihany no hahita an'iny, nefa ny namanao aza efa feranao ho olona vitsivitsy, ary faharoa dia tsy ho azo tadiavina akory ilay izy aty aoriana. Sady ny zavatra soratana ety ivelany rahateo (blaogy, forum sns) dia azonao aparitaka ao amin'ny facebook, fa ny zavatra ao amin'ny facebook tsy dia ho haparitakao ety ivelany.

Hevitra

Marina izany. Izany no mbola itiavako ity blaogiko ity, olona vitsy izahay sisa, indrisy, no mpanoratra ao !

Fa le fb anie toa tsy mivalapatra mitantara toy ny amin'ny blaogy akory anefa e, natao ho zavatra mandalo eritreritra ihany no be mpamaky, toy ny twitter. Raha misy article dia tsy mis en évidence akory ilay izy. Teny fohy tsy mahalaza hevitra no betsaka ao.

Nampidirin'i Kdaombaramita @ 10:01, 2012-03-19 [Valio]

Marina mihitsy izany, ary mila tohanana satria lasa kamokamo mihitsy ianao hanoratra tratrany ka hoe tsy alefanao facebook ny resaka

Nampidirin'i jentilisa @ 10:28, 2012-03-19 [Valio]

Tohanako ny hevitrao
Lasa Facebook no malaza amin'izao fotoana izao, raha misy fanontaniana manitikitika ny hafa ohatra dia ao amin'ny Facebook ihany izy no manontany, d raikitra ao avy eo ny adihevitra.
Ny ankamaroan'ny facebooker, indrindra ny tanora no tsy dia miditra rohy hafa ankoatran'ny Facebook fa rehefa miditra cyber izy na miditra internet d Fb foana, dia lasa variana ao, miady hevitra sns..!Ho an'izay mpitoraka bolongana mahafehy ny teny gasy sy manana hozaraina @izany angamba, tsara tokoa raha atao bilaogy.

Nampidirin'i mammysou @ 13:28, 2012-03-19 [Valio]

Hevitra

Misaotra anao nampatsiahy, fa saingy izaho kosa manao oe nampahantrain'ny internet ny boky.

Nampidirin'i Olona @ 19:49, 2012-03-19 [Valio]

Aiza ry Hery no misy billet d'avion Madagasikara mora???

Nampidirin'i Hors sujet @ 13:23, 2012-03-20 [Valio]

Marina tokoa

tena marina mihitsy ny tenin' i Hery ary anisany mahakivy ahy koa ilay zavatra mijanona ho fananan 'i fb

Tsara kokoa ny manao forum rehefa hiady hevitra amin'ny zavatra mety mahasoa fa mba hitan'ny maro hatrany

enga anie mba hiverina hampiasa tsara ny boky be ny rehetra :)

Nampidirin'i Angie @ 13:32, 2012-03-20 [Valio]

Marina loatra izay voalaza ary manohana ilay fanadihadihana aho. Izay angamba no atao hoe vokatry ny fivoarana. Indrisy !

Nampidirin'i Miora @ 15:37, 2012-03-20 [Valio]

Mahalasa saina !

Nampidirin'i DadaRabe @ 22:12, 2012-03-21 [Valio]

facebook sy internet

Samy manana ny hasiny sy ny asany ny facebook sy ny internet.
Ny facebook dia tambajotram-pifandraisana (reseau social) natao hifaneraserana amin'ny namama ary ny internet kosa dia natao ho hitan'ny rehetra ary entina hitovozana fahalalana sy vaovao amin'ny ankapobeny.
Ny olana tena lehibe anefa dia ny tsy fananan'ny olona ny fitaovana sy fotoana ary enti-manana hitrandraka azy roa ireo miaraka hany ka mionona amin'ny facebook ny ankamaroan'ny olona, ny tanora indrindra indrindra

Nampidirin'i alainrajaonary @ 23:00, 2012-03-21 [Valio]

blog forum

diso ny fijerin'i Hery, satria ao anatin'ilay asanao ilay resaka internet, blog sy forum dia resin'ny facebook ilay izy, dia ohatran'ny fifaninana rehetra io, fa tsy hoe nampahantrain'ny facebook akory ny internet fa nahay ny namorona azy dia zay fotsiny, dia mila mitady zavatra hafa ndray zany ahazoana toerana eo am sehatra, fa izay mijanona dia naman'ny mihemotra, satria na enao mandroso na enao mihemotra...

Nampidirin'i marc @ 01:38, 2012-03-22 [Valio]

marc: tsy hoe asako na tsia fa zavatra hita. Mety hiova ny facebook any aoriana any, dia ho azo tadiavina ami'ny moteur de recherche ny zavatra ao anatiny, dia ho faly indray aho. Satria izay ihany no tanjoko hoe azon'ny rehetra tadiavina ny zavatra ao amin'ny facebook. Ka tsy haikohoe inona no diso amin'izany, sa azon'ny rehetratsy mpikambana tadiavina ve ny zavatra ao amin'ny fb?

Nampidirin'i Hery @ 05:47, 2012-03-22 [Valio]

indro kely

misy tsy mitombina kely ny zavatra voalazan i Hery.
tsy tranomboky monja ny internet ary tsy tsena ihany koa fa fitambaran izy rehetra.Ahitana izao tontolo izao ny internet.Maro de maro ny moteur fanaovana recherche fa ny google ohatra no mahazatra anao.Nefa ny internet tsy google velively.Raha ny momban ny atody ohatra de mety ahita valiny mahafatrapo ianao fa possible mahita valiny n importe quoi ihany ko.Izany hoe valiny tsy mitombina velively.Afaka miteny tsara mihintsy aho ato fa ny salmonelle dia karazana champignon izay ilain ny vatana ihany koa amin ny lafiny toy izao sy toy izao avy izay hotohanako aminy fijery scientifique mitombona tsara ihany koa ,dia hihinana ary ianao sa tsy hihinana.
Ny facebook sy ny karazany indray...mirimorimo ny teknolojia, ny olona koa tsy ho hary hiazakazaka hanaraka izany fa izay tsotra sy mampilamina ny saina mba hiadanana no atao.Mmametraka sary ,mametraka phrase 2 na 3 sy ny mombamomba ny tena , tsy misy fitsaratsarana hoe marina sa diso sa mitombina sa mahasosotra ny zavatra lazain ny tena , ts ymisy arakaraka tsy misy fanadihadiana , vita kabary.hotohizana....

Nampidirin'i ibonia @ 23:35, 2012-03-24 [Valio]

Hevitra

Natao hijerena sy hamoahana ny tsiambaratelon'ny olona tsirairay iray sy ny manodidina azy ny FB,tsy misy zavatra azo ao fa ny mitsikera na ny mandoka ny sarin'ny namana sy ny heviny no atao .Ary ny mampalahelo dia variana any daholo ny olona.Anampiako ny hevitr'i Hery teo ohatra raha ao @ You tube fotsiny dia efa be dia be ny Video fampianarana na Mathematique na Physiques na Sciences ,...sns fa vitsy ny olona liana @ 'izany.
Indray andro nojereko ny fotoana laniko sy ny zavatra hazoko teo @ FB sy ny Google;Adin'ny roa teo @ FB sarina Sipa no hita,fa nanandrana adin'ny Roa teo @ Google izaho dia efa ho 1.5 Go ny pdf sy document azoko ary hita notombo kely ny fahalalana.
Amiko ny FB dia natao hifaneraserana @'ireo namana any alavitra sy any ampita fotsiny ihany izany hoe rehefa mi FB izaho dia 10 mn raha ela indrindra no eo.
Ary izao ny tena mapihomehy dia misy manao propagande mihitsy eo @ FB fa hilatsaka prezida!!!! Fiainana daholo izany e!!.....ouf!!!

Nampidirin'i Mpakavato @ 07:25, 2012-03-27 [Valio]

Samy marina ....

Samy marina avokoa ny voalazanareo teo ambony ireo na ny nanohana ny hevitry ny mpanoratra na ny toa nanohitra .
Raha ny fahitako azy anefa dia tsy mifanohita velively izay efa voalaza rehetra fa mifameno fottsiny ihany arakaraky ny sehatra amaritana azy (@ ilay antsoin'ny mpanao kajy hoe "domaine de définition")
Koa dia fintiniko @ hoe : "sakamalaho sy havozo , ny internet sy ny facebook , ka samy manana ny hanitra ho azy "

Nampidirin'i Aro Fiel @ 19:15, 2012-04-01 [Valio]

Digital Marketing Agency

mety mahasoa fa mba hitan'ny maro hatrany

Nampidirin'i Digital Marketing Agency @ 09:49, 2012-05-25 [Valio]
Hampiditra hevitra

E-mail me when comments occur on this article
Momba ahy
hery

Ho hitanao ato ny isandroko. Angoniko ato mba hovakiako indray any aoriana any :-)

calendar
« Aprily 2019 »
At Ta Ar Ak Zo As Ah
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          
Rohy
  • Blogroll
Tahiry