« | »

Raha tsy Ravalo fa tohanan-dRavalo?

2012-08-18 @ 20:19 in Politika

Araka ny heno dia mety anisan'ny fomba iray hiverenan-dRavalomanana ao Madagasikara ny tsy handraisany anjara amin'ny fifidianana ho avy manaraka io. Valin'izay koa anefa dia tsy afaka hirotsaka hofidina koa Rajoelina. Io izany no mety hitranga hoe samy tsy milatsaka hofidina Ravalo sy Rajoel. Dia iza no tena voa ary inona no mety hitranga?

Ho aiza Ravalo?

Tsy azo odian-tsy hita fa mbola manana lanja politika lehibe ao Madagasikara Ravalomanana, ary vao maika aza nampitombo hery azy ny zavatra nataon-dRajoelina nandritra ny telo taona teo amin'ny tetezamita. Raha tsy afaka hilatsaka hofidina Ravalo dia tsy maintsy hanohana olona iray, na hanendry olona iray mihitsy, hilatsaka hofidina. Io no fomba hahafahany mampiasa ny hery politikany ka hahafahany indray mandray fitondrana any aoriana any. Mety ho lany avy hatrany mantsy ny olona tendreny na tohanany raha toa ka izy mihitsy no anisan'ny mirotsaka amin'ny fampielezan-kevitra. Rehefa lany ny olona tendreny dia afaka manova na manitsy lalàna sy manatanteraka ny zavatra eriteretiny na dia ankolaka aza. Mahazo tombony izy izany.

Ho aiza Rajoel?

Raha tsy mahazo mirotsaka Rajoel dia hirehareha hoe vitany ny adidy dia ny tetezamita izany. Hiteny izy hoe mba ho fanarenam-pirenena dia tsy hilatsaka izy satria manao di-doha loatra Ravalomanana ka aleo samy miala. Amin'ny mpanohana azy dia hivoaka amboninahitra izy. Efa ampy nivelomany rahateo izay telo taona teo amin'ny fitondrana izay. Ny ho avy politikany no mety ho aotra na dia hoe manana ny antoko TGV aza izy satria tsy nanomana kianja politika mihitsy ny TGV fa variana fotsiny niady tamin-dRavalo. Asa na ho ampy azy ireo ny enimbolana hanomanana fifidianana raha hiatrika izany am-pahadiovana izy ireo. Mahazo tombony ihany nefa izany Rajoel satria afaka amin'ny mety ho valifaty ataon-dRavalo izay tena natahorany izy... ary afaka madiodio tamin'ny fanonganam-panjakana nataony.

Koa inoako fa raha tena mahay politika izy roalahy dia izao fotoana izao no tokony hanararaotana hamahana ny krizy. Ekeny sy reseny lahatra ny mpiara-dia aminy hanaiky ilay hoe samy tsy milatsaka izy roalahy. Ny vahoaka indray avy eo no hikarakara izay hirotsaka hofidiana manaraka eo.

Hevitra

Raha ny tsy filatsahana sy tsy fodiana no làlana narahin-dRavalo sy ny mpomba azy efa tany Tsiafahy ohatr'izay ny mpifanandrina aminy ary mialokaloka any ampita ny manan-katao. Tsy misy fomba tsotra ahafahana manaisotra ny manana basy fa tsy manam-bahoaka eo amin'ny fitondrana afa-tsy ny fifidianana, ary satria mbola izy no manomana sy mikarakara dia ny manaiky izay fitsipi-dalàna apetrany eo. Ny olana dia tsy "matoky valera" na ny andaniny na ny ankilany ka samy matahotra fifidianana, kanefa anie rehefa sendra ny isam-bato goavana tsy misy fomba hanodikodinam-bato intsony e! Jereo ny fomba nahalany an'i Andry Rajoelina ho Benitanàna teto Antananarivo fa betsaka loatra ny elanelam-bato teo aminy sy ny mpifanandrina ka dia tsy nisy azo natao hangalaram-bato fa dia nekena ny fahalaniany.
Izany hoe raha ireny fifidianana nokasain'ny tateza-mita hatao ireny no navela malalaka ary nandrotsahana olona iray hoe tena tohanan-dRavalo, ary tena mbola mamim-bahoaka tokoa izay Ravalomanana izany, tokony tsy ho sarotra ny hahita isan-jato any amin'ny 67% any...

Nampidirin'i DotMG @ 03:34, 2012-08-21 [Valio]

Anisan'ny olana tsy mampitovy hevitra amin'ity krizy ity ny hoe hetsi-bahoaka sa fanonganam-panjakana no nisy tamin'ny 2009. Raha ny théorie sy ny réalité no jerena dia samy manana ny rariny ny andaniny sy ny ankilany. Marina ny an'ny TGV hoe hetsi-bahoaka iny satria marobe ireny olona tamin'ny 26 janvier sy 07 février ireny.Raha ny réalité no jerena dia fanaon'ny mpanohitra ny manery ny fitondrana hiala amin'ny alalan'ny fidianana an-dalambe rehefa hitany fa tsy azo atokisana intsony ny fifandimbiasam-pahefana amin'ny alalan'ny fifidianana demokratika satria efa hain'ny mpitondra ny mamadika ny vokam-pifidianana.
Ankilany, tsy diso koa anefa ny filazan'ny mpomba an-dRavalomanana fa tena fanonganam-panjakana iny satria tsy nandalo fifidianana ary nisy fandrombaham-pahefana tamin'ny alalan'ny fitaovam-piadiana mahery vaika nataon'ny miaramila.
Tsotra ny vahaolana aorosoko
Aleo ny vahoaka no hitsara amin'ny alaln'ny fifidianana.
Samy hirotsaka hofidiana izy mirahalahy mianaka: Marc Ravalomanana sy Andry Rajoelina.
Raha lany Rajoelina dia tena hetsi-bahoaka iny tamin'ny 2009 iny ary mitombina ny fanenjehana rehetra natao an-dRavalomanana.
Raha toa ka Ravalomanana kosa no lany dia tena fanonganm-panjakana no nataon'ny FAT ary mendrika ny hohenjehina araka ny lalana manan-kery izy ireo
Raha olon-kafa mihitsy no lany dia efa tsy ilain'ny vahoaka intsony izany Ravalomanana sy Rajoelina ka mety amin'izy ireo ny manaja tena musintaka amin'ny resaka politika.

Nampidirin'i Mailaka @ 09:20, 2012-08-21 [Valio]

Miarahaba e!
Fa zah tena mahita fa tokony hanao politika koa i Hery a! (Tsy vazivazy fa tena resaka matotra).

Ny politika mantsy hoy izay reko izay : dia ny fandaminana toe-draharaha sarotra, mba hahazoan'ny andaniny sy ankilany tombontsoa avy.

Ary ity hevitra arosonao ity dia toa tsy hitako izay maharatsy azy. Ary na atao hoe ratsy aza, dia toa tsy maintsy hitranga :).

Nampidirin'i Tokinao @ 21:33, 2012-08-24 [Valio]
Hampiditra hevitra

E-mail me when comments occur on this article
Momba ahy
hery

Ho hitanao ato ny isandroko. Angoniko ato mba hovakiako indray any aoriana any :-)

calendar
« Aprily 2019 »
At Ta Ar Ak Zo As Ah
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          
Rohy
  • Blogroll
Tahiry