Hery - Tsiky dia ampy

Video: Injany fa miantso ahy

hery — Wed, 08 Sep 2010 02:11:12 +0200

Tena tiako ilay hira dia nataoko na dia tsy ampy fitaovana sy ratsy feo aza. Nandany fotoana ihany ny nanao azy fa vao fanandramana voalohany.

Hira nalaina tao amin'ny Fihirana Hasina P. 595
Ny video dia nalaina tamin'ny fakan-tsary finepix s1000 (Fujifilm), tsotra kokoa
Ny mozika dia notendrena manontolo tamin'ny Behringer UMA25S. Ilay Yamaha PSR E323 nanarahana ny playback fotsiny.
Ny feo dia narindra tamin'ny Cubase 5 (Nampiasa Halione1 sy Groove tamin'ny drums)
Ny sary dia narindra tamin'ny KDEnlive 0.7.7.1 (tao anaty Linux ubuntu studio).

Ny micro izany no hitako tsy mamely... rehefa mba ratsy ny feo tokony azo amboamboarina amin'ny micro tsss.

Arahabaina nahita masoandro i Tsiky

hery — Tue, 07 Sep 2010 12:36:56 +0200

Tonga teto an-tany tamin'ny alahady teo hono i Tsiky. Zazakely tahaka ny zaza rehetra. Ny nanaitra ahy fotsiny, ankoatr'ilay anarana nomen-dray sy reniny (akama) azy dia ny zokin'i Tsiky dia mitovy taona amin'i Aina, izany hoe 19 volana izao.

Mirary soa ho an'izy roa Ray aman-dRenin'i Tsiky Soary sy ny zokin'i Tsiky izay hendry be fa tsy mba mialona an-jandriny... Falifaly indray aza hono izy mahita an'ilay zazakely. Fa mba eritrereto hoe i Aina anie no manan-jandry sahady e? Toa ohatra ny mampalahelo izany ho hahita azy.

Izahay koa aloha ohatra an'izany e. Ny elanelan-taonako amin'ny zandriko dia 18 volana. Dia ny elanelan'io zandriko io amin'ny zandriny dia 12 volana katroka... ka angamba tsy maninona ihany. Matotra ny zaza rehefa misy zandriny (Jereo fotsiny aho lolll)

Mamerina ny firariantsoa eee

Facebook ato am-piasana, tsy tafa ny sakana

hery — Tue, 31 Aug 2010 09:07:32 +0200

Fantatrareo ihany moa fa efa am-bolana maro aho izay no tsy mampiasa facebook. Tamin'ny volana febroary tany ho any dia resiko lahatra koa ny tato am-piasana hisakanana ny facebook ato am-piasana. Nojerena mantsy ny statistika tao amin'ny routers ka ny 80%-n'ny sites mandalo ao dia facebook daholo. Ary ny fotoana ampiasana ilay facebook dia amin'ny fotoana fiasàna ny ankamaroany. Dia nasaina nojereko ary ny fomba hisakanana amin'ny fomba mihaja :-) ny facebook ato am-pisana. Pfsense no firewall napetrako ato amin'ny boite-nay handrindràna ny reseau ka misy fomba tsara nisakanana ny facebook. Tamin'izay fotoana izay dia nalefa tamin'ny page d'erreur fopla izay rehetra miditra facebook. Tsy fantatra amin'izay fotoana izay hoe ny ato am-piasana no misakana fa ohatry ny hoe tsy mandeha ny facebook. Fantatry ny ankizy ihany aloha hoe mandeha tsara ny facebook fa ny noheveriny dia hoe vokatry ny configurations-n'ny reseau ato am-piasana dia tsisy tafiditra facebook ry zareo.

Nandritra ny volana vitsivitsy dia nidina be mila ho 0 ny fampiasana facebook. Misy tafiditra ihany anefa, postes iray na roa ka tsy dia nivakiako loha.

Afak'omaly ary dia nasain'ny lehibe vaovao hanokatra facebook ho an'ny boite-nay aho. Hampahafantarana ny zava-misy sns. Mazava ho azy fa izaho tsy bloké. Dia nanokatra aho aloha dia avy eo nijery tsikelikely ireo olona hasaina ho namana. Teo aho vao gaga fa tafiditra facebook tsara amin'ny andro fiasana daholo ry zareo ato am-piasana. Misy ny sasany vao vetivety talohan'ny nanokafako no mametraka hafatra sns eo amin'ny mombamomba azy. Tonga saina aho hoe ary nahita hirika izany ry zalahy fa tsy miteniteny :-) Nanandrana niova poste aho dia niditra facebook fa mbola bloké tsara. Dia inona ary hoy aho ny fikany. Dia voatery aho niresaka tamin'ilay sipa tatsy ambony mody niteny hoe nasaina nanokatra compte facebook ho an'ny ato am-piasana ho'a zah kanefa toa bloké (sady manao an'le fiteny mody fanina be). Tonga dia nanazava be ilay sipa hoe "Toa ohatran'ny tsy eken'ny facebook hono ny réseau-ntsika fa angamba tsy sécurisé, hoy i anona... . Ka raha te hampiasa facebook ianao dia miditra amin'ny connexion sécurisée, izany hoe mampiasa https fa tsy http fotsiny rehefa miditra. Izany hoe https://facebook.com". Hay ve, hoy aho sady nisaotra. Nidina taty ambany dia nojerena fa tafiditra tokoa ny https. Dia nojerena fa hay tsy vosakan'ilay firewall ny https (grrr).

Dia inona moa izany fa tsy nisy vokany ilay fisakanana ny facebook tato am-piasana. Raha te hisakana facebook izany dia aleo ny mpiasa no tenenina mba hahafehy tena fa toa tsy misy fomba hafa.

[Raha mba fantatr'ilay sipa ao ambony mantsy lolll]

Tahotry ny zazakely

hery — Wed, 25 Aug 2010 14:58:21 +0200

Nisy fotoana elaela izahay tsy nandefa tele satria tsy tongan'ny satellite eny aminay fa ao ambadiky ny tendrombohitra. Nahafinaritra ery ny fiainana tsy nisy télé zany :-)

Taty aoriana rehefa nahazo digital terrestre dia nanjary nisy télé indray tao an-trano. Tia télé ~~loatra~~ be mantsy i Aina.

Tsapako nefa fa misy zavatra mampatahotra azy amin'ny zavatra sasany mandeha eo amin'ny télé. Tsy voatery film satria raha vao misy film dia efa voasivana be mihitsy vao alefa, fa na dia dokam-barotra aza. Miezaka mijery izy fa hita hoe sady matahotra. Dia indraindray aza somary miala lavitra, ambadiky ny canapé ohatra.

Ity pub iray ity izao anisan'ny mampatahotra azy. Vao manomboka ilay pub (mbola tsisy mikotaba na inona na inona akory) dia efa lasa izy miafina alavitra. Angamba vokatry ny nahitany azy tamin'ny voalohany dia fantany ny tohiny.

Manaova fety sambatra

hery — Sat, 26 Jun 2010 08:24:28 +0200

Dia miarahaba ny Malagasy nahatratra izao faha 50 taonan'ny nanomezana an-taratasy ny fahaleovan-tena izao.

Azo atao tsara ny manao fety na dia tsy hiaraka sy tsy hanatrika ny fetin'ny HAT aza. Ahoana tokoa moa no hiaraka hanao fety raha tsy olona efa mihavana sy mifankatia? Hanao fety ianao kanefa gadrainy ny havanao, hidiny ny radio fihainonao, samboriny ny namanao... ianao anefa antsoiny hanao fety miaraka aminy.

Miantsoantso fihavanana izy kanefa izy aza tsy manao dingana iray amin'izany akory.

Mety mahavita fety goavana sy makotroka izy. Tsy mampaninona izany satria azy ny vola sy ny bois de roses. Fa ianao kosa raha tsy mankasitraka izay ataony dia aza manaiky ny mena miraviravy. Robarobain'ny mpanana. Aleo ravim-bomanga tsy arahin-dromoromo toa izay sakafo be arahin-datsa.

Tandremo sao ataony fitaovana ianao. Notambatambazany an'izao rehetra izao hanatrika ny fety karakarainy, dia avy eo lazainy eran-tany fa nanaiky sy nakatò azy. Faly ery izy hampiseho sary hoe an'aliny no nanatrika izany... ary anisany ianao.

Koa manaova fety sambatra ary, mba ho tena sambatra tokoa anefa fa tsy arahin'ny feon'ny fieritreretana.