Bye bye serasera yahoogroups

2020-12-06 @ 17:43 in Serasera.org, Izaho sy ny ahy

Lahatsoratro farany tao amin'ny serasera@yahoogroups.com 

---------

Miarahaba antsika rehetra

 

Araka ny vaovao izany dia mifarana amin'ity faha 15 ny volana désambra 2020 ity ny Yahoo Groups izay nampiantrano ny dinidinika teto amin'ny Serasera nandritra izay 20 taona mahery kely izay. Nanomboka tamin'ny taona 1999 tany tokoa no nanombohan'ity toerana fifanakalozana ity. Ary ity fifandraisana antsoratra ity no niantombohan'ny hevitra rehetra ao amin'ny serasera.org Nisy ny fotoana tena nilàna izany teo amin'ny fiainan'ny diaspora. Fotoana nahafinaritra ireny ka isaorana antsika rehetra.
Amin'izao fotoanan'ny tambazotram-piaraha-monina izao dia tsy dia misy manoratra eto firy intsony isika na dia mbola mandray hafatra daholo ihany aza. Amin'izao dia misy 1000 mahery ny mpikambana mbola mandray hafatra. Ka angamba hivalona ho tantara amin'izay izany ny Serasera. Raha misy soso-kevitra hafa moa dia raisina ihany.
Koa mamerina ny fisaorana antsika rehetra indrindra ireo izay teto hatramin'ny voalohany, niatrika ny resaka rehetra teto. Angamba nisy vokany tamin'ny fiainantsika, na ny fiainan'ny Malagasy hafa ihany ireny resaka rehetra nandalo teto ireny. Ho ahy manokana dia nampivoatra ny fomba fisainako sy ny fomba fijeriko ny raharaham-pirenena ny fiseraserana teto amin'ny serasera ary nandray anjara tamin'izany avokoa ianareo rehetra.
Ny takelaka serasera.org sy ireo sampana rehetra avy aminy dia ezahiko tohizana ihany.
Soava dia daholo
Hery

 

Mifindra lohamilina koa ny blaogy

2016-03-31 @ 08:57 in Serasera.org

Miezaka mamindra monina ny site blaogy.com ho amina serveur vaovao aho ka raha toa misy olana dia mba ilazao :-) 

hery@serasera.org

Algorithme ohabolana

2015-05-06 @ 22:23 in Serasera.org

Teo am-panatsarana ny takelaka ohabolana (ohabolana.org) aho no sahirana kely satria betsaka ny ohabolana mitovy sy miverimberina nefa ny mpitsidika dia mampiditra ohabolana ihany. Tenenina izy ireo hoe tadiavo aloha, saingy raha diso fanoratra ilay ohabolana teo aloha dia mazava ho azy tsy hitany. Ny rindran-kajy natao koa dia mijery fotsiny raha misy ohabolana tena mitovy izay vao milaza. Fa raha vao samihafa kely fotsiny dia ampidiriny ihany.

Koa amin'izao aho izany dia mandinika hoe inona no fomba mety kokoa mba hampihena ny ohabolana mitovy tafiditra... ankoatra ny fisian'ny olona mandrindra izay mitady ohabolana sy mamafa izay mitovy. Raha misy manana hevitra dia tonga soa. Holazaiko eo ihany ny vokatry ny fandinihana rehefa kelikely.

Fa amin'ny ankapobeny aloha izany dia efa mba vitavita ny takelaka ohabolana.org ka afaka mitady sy mampiditra ohabolana tsara indray. Azo jerena amin'ny finday koa izy amin'izao fotoana izao.

Ito sary ambany ito izao dia mampiseho ny olana... izay tsy maintsy hovahaina.

Nahita portefeuille :-)

2015-01-06 @ 19:19 in Serasera.org

Noho ny antony mazava loatra dia tsy tena sarin'ny zavatra hita no hapetraka eto amin'ity resaka ity. Fotoanan'ny krizy lahatsoratra koa izao (vakansy sns) koa dia itony tantara itony no tantaraina :-)

Avy niara-nivavaka sy nifampiarahaba tratry ny taona tamin'ny namana protestanta izahay ny alahady hariva (rehefa avy nahavita ny anjaran'ny Katolika ny maraina), dia alohan'ny hidirana tao anaty fiara dia nahita poketra (portefeuille) teo amin'ny tany. Nalaina dia nisy cartes de credit maro be tao anatiny (10, eny 10) ary nisy taratasy famelàna hitondra fiara sy taratasy madinika maromaro.  (tohiny)

Serasera 15 taona lasa izay

2014-10-02 @ 21:25 in Serasera.org, Tsiaro

Tamin'ny 1999, 3 oktobra izy izay, no nivorivory teo antokontanin'ny oniversité iray tany Afrika izahay mpinamanamana, niresa-dresaka. Dia nitsiry ny hevitra hoe hanamboatra sehatra iray, amin'ny internet, hifandraisan'ny Malagasy. Dia ny alin'iny aho no nitady ny fomba rehetra hanombohana izany. Nanomboka tamin'ny zavatra tsotra, maimaim-poana, nitady hébergements tetsy sy teroa, maimaim-poana. Dia nivoatra tsikelikely. Dia nalaza be... dia miha-mangina, dia fohazina kely dia mangina indray :-p. Fa ny mahafaly dia mbola mitohy hatrany hatramin'izao. Feno 15 taona androany tokoa izany izao ny Serasera. Betsaka ny nandalo tao, fa misy koa ny tsy mbola nandre ny fisiany... tsy maninona izany, mbola maro ny fotoana hihaonana eny an-dalana eny :-)

Fa tahaka izao aho tamin'izany fotoana izany :-)

Hery 1999

Momba ahy
hery

Ho hitanao ato ny isandroko. Angoniko ato mba hovakiako indray any aoriana any :-)

calendar
« Janoary 2022 »
At Ta Ar Ak Zo As Ah
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            
Rohy
  • Blogroll
Tahiry